Ընթերցված գրքերի լավագույն տասնյակ. առաջարկում եմ կարդալ

«Կոմս Մոնտե Քրիստո» - Ալեքսանդր Դյումա
Ցավալի պատմություն, որ կատարվեց մի հրաշալի երիտասարդի հետ: Ընկերոջ դավաճանությունն օգնեց նրան ավելի ուժեղ լինել և ինքնությույն պայքարել անարդարությունների դեմ:
«Ֆիեստա» - Էռնեստ Հեմինգուեյ
Իրադարձությունները տեղի են ունենում Իսպանիայի Պամպլոնա քաղաքում: Այստեղ է ժամանել ընկերական մի խումբ` մասնակցելու ցլամարտի միջոցառումներին: Գլխավոր հերոսը մի երիտասարդ է, ով Առաջին համաշխարհային պատերազմի ժամանակ լուրջ վնասվածք է ստացել ու դարձել իմպոտենտ:

«Ջեյն Էյր» - Շառլոթ Բրոնտե

Սիրավեպի հերոսուհին 18-ամյա Ջեյնն է` ծնողազուրկ, միայնակ, բայց միաժամանակ կրթված, խելացի ու հետևողական մի օրիորդ: Մասնավոր տանն աշխատանքի անցնելուց հետո նրա առջև բացվում է հույսերով ու հուսախաբություններով լի մի նոր աշխարհ:
«Մոլ Ֆլենդերս» - Դանիել Դեֆո
Վեպը Նյուգեյթի բանտում ծնված մի աղջկա մասին է, ով իր ողջ կյանքն ապրում է մեղանչելով, բայց մահանում  զղջումի զգացումը սրտում պահած:
«Լուսին և 6-պենսանոց» - Սոմերսեթ Մոեմ
Մոեմի լավագույն վեպերից մեկը` գեղեցիկը բացահայտելու ու կերտելու անհագ ցանկություն ունեցող մի նկարչի մասին: 
«Մոնթեսումայի դուստրը» - Հենրի Հագարդ
Պատմական-կենսագրական-սիրային գեղեցիկ ստեղծագործություն, որի մեջ կարելի է տեսնել սպանություն, դավաճանություն, վրեժ, պատերազմ, սեր…
«Հանճարը» - Թեոդոր Դրայզեր
Ամերիկյան հայտնի գրողներից մեկի ոչ պակաս հայտնի վեպերից: Նկարիչ Յուջինը սիրային պատմությունների ու հոգևոր տառապանքների երկար ճանապարհ պետք է անցնի, մինչև գտնի այն, ինչ իրականում փնտրում է:
«Կամելիազարդ տիկինը» - Ալեքսանդր Դյումա
Վեպի սկզբում գլխավոր հերոսուհին արդեն մահացած է: Նրա նախկին սիրեցյալը վերհիշում է իր սիրելիի հետ անցկացրած երջանիկ օրերն ու փորձում ամեն ինչ անել` Կամելիազարդ տիկնոջից մի հիշատակ ստանալու համար:
«Սիրտը» - Էդմոնդո դե Ամիչիս
Գիրքն իրենից մի դպրոցականի օրագիր է ներկայացնում, որտեղ պատմվում է սոցիալական տարբեր կարգավիճակ ունեցող, բայց նույն դասարանում սովորող երեխաների հարաբերություններն ու վերաբերմունքը միմյանց նկատմամբ:
«Արքայազնը և աղքատը» - Մարկ Տվեն
Հետաքրքիր ու թեթև ստեղծագործություն երկու տղայի մասին, որոնցից մեկը քաղաքի որջերում ապրող աղքատ պատանի է, իսկ մյուսը` Ուելսի արքայազնը: Նրանք արտաքինով իրարից չեն տարբերվում, բայց ամեն ինչ սկսվում է այն ժամանակ, երբ տղաները որոշում են մեկ ժամով փոխանակել իրենց հագուստները: 

Աիդա Գրիգորյան