Ներդաշնակ գիտություններ, կինո. Մաս 3

Առաջին մաս
Երկրորդ մաս

1. «Սպանել թագավորին» /To kill a king, 2003/

Ստյուարտական Անգլիայում XVII դարն է, և երկրում գահակալում է Չարլզ I-ը: Միապետական բացարձակ կարգերից ու եկեղեցական ռեֆորմներից դժգոհ ընդդիմադիրները Օլիվեր Կրոմվելի և Թոմաս Ֆեյրֆաքսի շնորհիվ հաղթանակ են տանում թագավորական զորքերի նկատմամբ, իսկ խորհրդարանը որոշում է Չարլզին գլխատել: Օլիվերն իրեն հայտարարում է լորդ-պրոտեկտոր և վերածվում ավելի վայրագ բռնակալի, քան իր նախորդն էր:  

2. «Արտատպելով Բեթհովենին» /Copying Beethoven, 2006/

Գերմանացի կոմպոզիտոր, դաշնակահար, դիրիժոր Լյուդվիգ վան Բեթհովենի վերջին տարիները պատմվում են կոնսերվատորիայի ուսանողուհի Աննա Հոլցի աչքերով, ով նրա մոտ աշխատանքի է անցնում որպես օգնական-նոտագրող: Այս շրջանում է, որ ստեղծվում է նշանավոր 9-րդ սիմֆոնիան և 1824թ առաջին անգամ բեմադրվում Վիեննայում:
Կարդացեք նաև՝ Հեղափոխական ժխտված իդեալներ, Նապոլեոն և Բեթհովեն
3. «Էլ Գրեկո» /El Greco, 2007/

Ծագումով կրետացի նկարիչ Դոմենիկոս Թեոտոկոպուլոսի կեղծանունը կարելի է բառացի թարգմանել՝ «հույն»: Նրա փախուստը ծննդավայրից, Վենետիկում հանդիպումը Տիցիանի հետ, իսպանական Տոլեդո քաղաքում հաստատվելը, «Կոմս Օրգասի թաղումը», «Մարիամ Մագդաղինացին», «Կարդինալ Նինյո դե Գևարայի դիմանկարը» կտավների ստեղծումը և վերջապես տարաձայնությունները ինկվիզիցիայի հետ կազմում են կենսագրական դրամայի հիմնական սյուժեն:
4. «Մահացած թագուհին» /La Reine morte, 2009/

Պորտուգալիայի թագավորը, քաղաքական նպատակներից ելնելով, մտադիր է գահաժառանգ Պեդրոյին ամուսնացնել Իսպանիայի ինֆանտայի (արքայադուստր) հետ՝ երկու երկրների միջև հարաբերությունները լավացնելու համար: Պարզվում է, որ իր որդին արդեն մեկ տարի է ազնվականուհի Ինես դե Կաստրոյի ամուսինն է և չի պատրաստվում կատարել հոր կամքը: Ողջ կմնա՞ արդյոք Դե Կաստրոն, թե՞ գահը նրան սպասում է հետմահու:
5. «Լյուդվիգ Բավարացի» /Ludwig II, 2012/

Իր ժամանակի կենդանի լեգենդ, արվեստի, երաժշտության ու ճարտարապետության գիտակ, բարետես ու երիտասարդ Լյուդվիգ II-ը բավարական գահը ստանում է հոր՝ Մաքսիմիլիան II-ի մահից հետո: Պետական գանձարանից խոշոր գումարներ են հատկացվում Ռիխարդ Վագներին արքունիքում հյուրընկալելու, ամրոցներ կառուցելու վրա: Իսկ Բավարիան կանգնած է Ավստրո-պրուսա-իտալական կամ Գերմանական պատերազմի շեմին և 1866թ տանում է ռազմական ծանր պարտություններ:
Կարդացեք նաև՝ Լյուդվիգ II. ամրոցների Կարապ-արքան

Հ.Գ. Ներդաշնակ գիտություններն են պատմությունը և արվեստը, որոնք ընկած են վերը նշված ֆիլմերի բովանդակության հիմքում:

Աիդա Գրիգորյան